നൂറ് നാടൻ താളവാദ്യ കലാകാരന്മാരെ അണിനിരത്തി ‘യെല്ലമ്മ’ ടൈറ്റിൽ സോങ് റെക്കോർഡ് ചെയ്ത് റോക്ക്‌സ്റ്റാർ ദേവി ശ്രീ പ്രസാദ്, ഗാനത്തിൻ്റെ റിലീസ് ഉടൻ; ചിത്രത്തിൻ്റെ ആഗോള റിലീസ് 2027 മാർച്ച് 5 ന്

 

നൂറ് നാടൻ താളവാദ്യ കലാകാരന്മാരെ അണിനിരത്തി ‘യെല്ലമ്മ’ ടൈറ്റിൽ സോങ് റെക്കോർഡ് ചെയ്ത് റോക്ക്‌സ്റ്റാർ ദേവി ശ്രീ പ്രസാദ്, ഗാനത്തിൻ്റെ റിലീസ് ഉടൻ; ചിത്രത്തിൻ്റെ ആഗോള റിലീസ് 2027 മാർച്ച് 5 ന്

റോക്ക്‌സ്റ്റാർ ദേവി ശ്രീ പ്രസാദിനെ നായകനാക്കി വേണു യെൽദണ്ടി സംവിധാനം ചെയ്യുന്ന ‘യെല്ലമ്മ’ എന്ന ചിത്രത്തിന്റെ ടൈറ്റിൽ സോങ് വൻ സംഗീതാവിഷ്കാരമായി ഒരുങ്ങുന്നു. ഇന്ത്യയുടെ വിവിധ ഭാഗങ്ങളിൽ നിന്നുള്ള നൂറ് പരമ്പരാഗത നാടൻ താളവാദ്യ കലാകാരന്മാരെ അണിനിരത്തിയാണ് ദേവി ശ്രീ പ്രസാദ് ഗാനത്തിന്റെ റെക്കോർഡിങ് നിർവഹിച്ചിരിക്കുന്നത്. നാടൻ സംഗീതത്തിന്റെ കരുത്തും വൈവിധ്യവും ഒരുമിപ്പിക്കുന്ന ഗാനത്തിന്റെ പ്രത്യേകതകൾ പുറത്തുവിട്ടതോടെ ചിത്രത്തിന്റെ സംഗീതത്തിനായുള്ള കാത്തിരിപ്പും വർധിച്ചിരിക്കുകയാണ്. ഗാനം ഉടൻ പുറത്തിറങ്ങും. ദിൽ രാജു അവതരിപ്പിക്കുന്ന ചിത്രം ശ്രീ വെങ്കിടേശ്വര ക്രിയേഷൻസിന്റെ ബാനറിൽ ഷിരീഷ് നിർമ്മിക്കുന്നു. 2027 മാർച്ച് 5ന് ചിത്രം ആഗോളതലത്തിൽ തിയേറ്ററുകളിലെത്തും.

ചിത്രത്തിന്റെ പ്രഖ്യാപനവും ഫസ്റ്റ് ലുക്കും പുറത്തുവന്നതുമുതൽ ‘യെല്ലമ്മ’ വലിയ പ്രേക്ഷകശ്രദ്ധ നേടിയിരുന്നു. ഇപ്പോൾ നൂറ് നാടൻ താളവാദ്യ കലാകാരന്മാരെ പങ്കെടുപ്പിച്ചുള്ള ടൈറ്റിൽ സോങ് റെക്കോർഡിങ്ങിലൂടെ സിനിമയുടെ സംഗീതലോകത്തെക്കുറിച്ചുള്ള പ്രതീക്ഷകൾ വീണ്ടും ഉയരുകയാണ്. ഇന്ത്യയുടെ വിവിധ പ്രദേശങ്ങളിലെയും സംസ്കാരങ്ങളിലെയും നാടൻ താളങ്ങളുടെ വൈവിധ്യം ഒരൊറ്റ ഗാനത്തിൽ കോർത്തിണക്കുകയാണ് ദേവി ശ്രീ പ്രസാദ്. നൂറ് കലാകാരന്മാർ, ഒരൊറ്റ ശക്തമായ സംഗീതാവിഷ്കാരം എന്ന വിശേഷണത്തോടെയാണ് അണിയറപ്രവർത്തകർ ഗാനത്തെ അവതരിപ്പിക്കുന്നത്. ഈ സംഗീതവിസ്മയം പ്രേക്ഷകരിലേക്ക് എത്താനുള്ള കാത്തിരിപ്പിലാണ് സിനിമാലോകം.

സംഗീതസംവിധായകനെന്ന നിലയിൽ ഇന്ത്യൻ സിനിമയിൽ ശ്രദ്ധേയനായ റോക്ക്‌സ്റ്റാർ ദേവി ശ്രീ പ്രസാദ് ആദ്യമായി നായകനായി എത്തുന്ന ചിത്രം എന്നതാണ് ‘യെല്ലമ്മ’യുടെ പ്രധാന പ്രത്യേകത. ‘ബലഗം’ എന്ന ചിത്രത്തിലൂടെ ശ്രദ്ധേയനായ വേണു യെൽദണ്ടിയാണ് ചിത്രം സംവിധാനം ചെയ്യുന്നത്. ദേവി ശ്രീ പ്രസാദിന്റെ അഭിനയ അരങ്ങേറ്റവും വേണു യെൽദണ്ടിയുടെ സംവിധാനവും ഒന്നിക്കുന്ന ചിത്രം പ്രഖ്യാപനവേള മുതൽ തന്നെ വലിയ പ്രതീക്ഷകൾ സൃഷ്ടിച്ചിട്ടുണ്ട്. നിലവിൽ സിനിമയുടെ ചിത്രീകരണം പുരോഗമിക്കുകയാണ്. ചിത്രത്തിന്റെ കഥാപശ്ചാത്തലത്തെയും മറ്റു താരങ്ങളെയും കുറിച്ചുള്ള കൂടുതൽ വിവരങ്ങൾ അണിയറപ്രവർത്തകർ പുറത്തുവിട്ടിട്ടില്ല.

തെലുങ്ക്, തമിഴ്, ഹിന്ദി, മലയാളം, കന്നഡ എന്നീ അഞ്ച് ഭാഷകളിലായാണ് ‘യെല്ലമ്മ’ ആഗോളതലത്തിൽ റിലീസ് ചെയ്യുന്നത്. നാടൻ സംഗീതത്തിന്റെ കരുത്ത് അടയാളപ്പെടുത്തുന്ന ടൈറ്റിൽ സോങ് ഉടൻ പുറത്തിറങ്ങാനിരിക്കെ, ചിത്രത്തിന്റെ പാൻ ഇന്ത്യൻ റിലീസിനായുള്ള കാത്തിരിപ്പും ശക്തമാകുന്നു. 2027 മാർച്ച് 5ന് ചിത്രം ലോകമെമ്പാടുമുള്ള തിയേറ്ററുകളിലെത്തും.

സംവിധാനം: വേണു യെൽദണ്ടി, അവതരണം: ദിൽ രാജു, നിർമ്മാണം: ഷിരീഷ്, ബാനർ: ശ്രീ വെങ്കിടേശ്വര ക്രിയേഷൻസ്, സംഗീതം: റോക്ക്‌സ്റ്റാർ ദേവീശ്രീ പ്രസാദ്, പിആർഒ : ശബരി