കുപ്പിച്ചില്ലിന്റെ മൂർച്ചയുള്ള ശക്തമായ സിനിമ'; 'അപ്പൻ' സിനിമക്ക് പ്രശംസകൾ കൊണ്ടുമൂടി രഘുനാഥ് പലേരി.”

മജു സംവിധാനം ചെയ്ത് സണ്ണി വെയ്ൻ,അലൻസിയർ ലേ ലോപ്പസ്  എന്നിവർ പ്രധാന കഥാപാത്രങ്ങളെ അവതരിപ്പിക്കുന്ന 'അപ്പൻ' സിനിമയുടെ പ്രിവ്യു ഷോക്ക് അതിഗംഭീരമായ റിപ്പോർട്ടുകൾ ആണ് സിനിമ ഇൻഡസ്ട്രിയിൽ നിന്നുംലഭിച്ചുകൊണ്ടിരിക്കുന്നത്. 

മലയാള സിനിമയുടെ  പ്രമുഖ എഴുത്തുകാരൻ രഘുനാഥ് പലേരിയും ഈ ചിത്രത്തിൻ്റെ പ്രിവ്യു കണ്ട പ്രമുഖരിൽ ഒരാളായിരുന്നു. ഇപ്പോൾ ഗംഭീര അഭിപ്രായങ്ങൾ അദ്ദേഹം സിനിമയെ കുറിച്ച് സോഷ്യൽ മീഡിയയിൽപങ്കുവെച്ചിരിക്കുന്നത്.രഘുനാഥ് പാലേരി അപ്പൻ സിനിമയെ കുറിച് ഫേസ്ബുക്കിൽ കുറിച്ച വാക്കുകൾ:

 "കുപ്പിച്ചില്ലിന്റെ മൂർച്ചയുള്ള ഒരു സിനിമ കണ്ടു. പേര് അപ്പൻ. സംവിധാനം മജു. ആർ ജയകുമാറും മജുവും ചേർന്നുള്ളൊരു എഴുത്ത്. ഏത് പ്രതലത്തിലാവും റിലീസ് എന്നറിയില്ല. ഏതിലായാലും വല്ലാത്തൊരു മൂർച്ചയുള്ള അനുഭവമാകും. മനസ്സടി മുറിഞ്ഞു ചിതറുന്ന മകനായ് സണ്ണി വെയ്നും, എത്ര തീറ്റ കിട്ടിയിട്ടും വെറി മാറാത്ത വ്യാഘ്രരൂപമായൊരു അപ്പനായി അലൻസിയറും.  ആദ്യമായാണ് സിനിമയിൽ ഇങ്ങിനെ ഒരപ്പനേയും മകനേയും കാണുന്നത്. പതിയെ ഊർന്നൂന്ന് മുറിക്കുന്നൊരു ഈർച്ചവാൾ സിനിമ. ഒരിടത്തും അശേഷം ഡാർക്കല്ലാത്തൊരു സിനിമ. വരുമ്പോൾ കാണുക. വ്യത്യസ്ഥമായ സിനിമകൾ ഇറങ്ങട്ടെ. അടുത്ത സിനിമയും എടുത്ത് മജുവും വേഗം വരട്ടെ."

 വളരെ അധികം നിഗൂഢതയും വന്യതയും പങ്കുവെക്കുന്ന എന്നാൽ നർമ്മ സ്വഭാവം നിലനിർത്തുന്ന അപ്പൻ സിനിമയുടെ വ്യത്യസ്തമായ ടീസർ യൂട്യൂബിൽ വളരെ അധികം ജനശ്രദ്ധയും പ്രശംസയും മുൻപേ തന്നെ നേടിയിരുന്നു. ഈ ചിത്രം ചർച്ച ചെയ്യുന്ന വന്യത നിറഞ്ഞ ഇതിവൃത്തതോട് ചേർന്ന് നിൽക്കുന്ന മിനിമൽ പോസ്റ്ററും ഒട്ടനവധി ചർച്ചകൾക്ക് വഴി വെച്ചിരുന്നു. 

അരക്ക് കീഴെ തളർച്ച ബാധിച്ച് കട്ടിലിൽ ജീവിതം തള്ളി നീക്കുന്ന ഒരു അപ്പന്റെയും അദ്ദേഹത്തിന്റെ സ്വത്തിനായി മരണം കാത്ത് നിൽക്കുന്ന ഭാര്യയുടേം മക്കളുടെയും മരുമക്കളുടെയും കുടുംബ ജീവിതത്തിലെ കാഴ്ചകളാണ് 'അപ്പൻ' സിനിമയുടെ ഇതിവൃത്തം. പൊതുവേ ഇത്തരം സിനിമകളിൽ  ഏറ്റവും നെഗറ്റീവ് ഷേഡുള്ള കുടുംബത്തിന് അങ്ങേയറ്റം ശല്യമായ ഒരു അപ്പന്റെ വേഷമാണ് ചിത്രത്തിന്റെ ടൈറ്റിൽ കഥാപാത്രം തന്നെ ചെയ്യുന്ന അലൻസിയറൂടേത്. സണ്ണി വെയ്നും ഗ്രെയ്‌സ് ആന്റണിയും മക്കളുടെ വേഷവും, അനന്യയും വിജിലേഷും മരുമക്കളുടെ വേഷവും ചെയ്യുന്ന ചിത്രത്തിൽ പോളി വത്സൻ അലൻസിയറുടെ ഭാര്യയുടെ വേഷം ചെയ്യുന്നു. പുതുമുഖ താരമായ രാധിക രാധാകൃഷ്ണനും മികച്ചൊരു കഥാപാത്രത്തെ കൈകാര്യം ചെയ്യുന്നുണ്ട്. എല്ലാ പ്രധാന കഥാപാത്രങ്ങളും ചിത്രത്തിൽ നെഗറ്റീവ് സ്വഭാവമാണ് പുലർത്തുന്നത് എന്ന പ്രത്യേകതയും ഉണ്ട്. മലയോര കർഷകരുടെ പശ്ചാത്തലത്തിൽ ആണ് ചിത്രത്തിൻ്റെ കഥ നടക്കുന്നത്.

തൊടുപുഴയിൽ ആണ് ചിത്രീകരണം നടന്നത്. 2 സംസ്ഥാന അവാർഡും മികച്ച രണ്ടാമത്തെ ചിത്രത്തിനുള്ള ഫിലിം ക്രിട്ടിക്സ് അവാർഡും ലഭിച്ച പ്രജേഷ് സെന്നിന്റെ 'വെള്ളം' സിനിമക്ക് ശേഷം ജോസ്‌കുട്ടി മഠത്തിൽ രഞ്ജിത് മണമ്പ്രക്കാട്ട് എന്നിവർ ടൈനി ഹാൻഡ്സ് പ്രൊഡക്ഷൻസിന്റെയും സണ്ണി വെയ്ൻ പ്രൊഡക്ഷൻസിന്റെയും ബാനറിൽ ആണ് ഈ ചിത്രം നിർമ്മിക്കുന്നത്.  

സംവിധായകൻ മജുവും ആർ ജയകുമാറും ചേർന്നാണ് ചിത്രത്തിന്റെ കഥ, തിരക്കഥ, സംഭാഷണം എന്നിവ കൈകാര്യം ചെയ്തിരിക്കുന്നത്. പപ്പു, വിനോദ് ഇല്ലമ്പള്ളി എന്നിവർ ഛായാഗ്രഹണവും കിരൺ ദാസ് എഡിറ്റിംഗും നിർവഹിച്ച ചിത്രത്തിനായി അൻവർ അലിയും വിനായക് ശശികുമാറും ചേർന്ന് ഒരുക്കിയ വരികൾക്ക് ഡോൺ വിൻസെന്റ് സംഗീതസംവിധാനം നിർവഹിച്ചിരിക്കുന്നു. കലാസംവിധാനം: കൃപേഷ് അയ്യപ്പൻകുട്ടി, ചമയം: റോണക്‌സ് സേവിയർ. ടൈറ്റിൽ: ഷിന്റോ, ഡിസൈൻസ്; മുവീ റിപ്പബ്ലിക്‌, പി ആർ ഒ: മഞ്ജു ഗോപിനാഥ്, ഡിജിറ്റൽ മാർക്കറ്റിംഗ്‌: എം‌. ആർ. പ്രൊഫഷണൽ.