ഏറ്റവും പ്രേക്ഷകപ്രതീക്ഷയുള്ള ഇന്ത്യൻ സിനിമ 777 ചാർളി.

തമിഴ്-ബോളിവുഡ് വമ്പന്മാരെ വെല്ലുവിളിച്ച് വീണ്ടുമൊരു കന്നഡ ചിത്രം പാൻ ഇന്ത്യൻ തരംഗമാകുന്നു. രക്ഷിത് ഷെട്ടി നായകനാകുന്ന '777 ചാർളി'യാണ് പുത്തൻതരംഗമായി സോഷ്യൽ മീഡിയയിൽ മാറിയിരിക്കുന്നത്.

തമിഴിൽ നിന്നും കമൽഹാസൻ-ലോകേഷ് കനകരാജ് കൂട്ടുകെട്ടിൻ്റെ മെഗാ-മൾട്ടിസ്റ്റാർ ചിത്രം 'വിക്രം' ഈ വരുന്ന ജൂൺ 3ന് വമ്പൻ ഹൈപ്പുമായി തിയേറ്ററുകളിലെത്തുന്നു. അതേ ദിവസംതന്നെയാണ് ബോളിവുഡിൽ അക്ഷയ് കുമാർ-യാഷ് രാജ് കൂട്ടുക്കെട്ടിൻ്റെ ബിഗ്-ബഡ്ജറ്റ് ഇതിഹാസ ചിത്രം 'പൃഥ്‌വിരാജ്' റിലീസ് ആകുന്നതും. രണ്ട് അതിബ്രഹ്മാണ്ഡ സൂപ്പർതാര ചിത്രങ്ങൾ തെക്കും വടക്കുമായി ഇന്ത്യൻ ബോക്സ് ഓഫീസിൽകൊമ്പുകോർക്കാനൊരുങ്ങുന്നു. 

എന്നാൽ ഈ രണ്ട് വമ്പൻ ഇൻഡസ്ട്രികളുടെ അഭിമാനചിത്രങ്ങളേക്കാൾ രാജ്യമെങ്ങും തരംഗമായിരിക്കുന്നത് അടുത്തയാഴ്ച റിലീസിനൊരുങ്ങുന്ന ഒരു കന്നഡ ഫീൽ-ഗുഡ് ചിത്രമാണ് എന്ന പ്രത്യേകതയാണ് ഇവിടെ ശരിക്കും 'ട്രെൻഡിങ് ന്യൂസ്'!!

ഇൻറ്റർനെറ്റ് മൂവി ഡാറ്റാബേസ് അഥവാ ഐ.എം.ഡി.ബി. യുടെ ഈ മാസത്തെ ഏറ്റവും പ്രേക്ഷകപ്രതീക്ഷയുള്ള ഇന്ത്യൻ സിനിമകളുടെ ലിസ്റ്റിൽ ആണ് ഏറ്റവുമധികം പോളിംഗ് ലഭിച്ച ചിത്രമായി 777 ചാർളി മാറിയിരിക്കുന്നത്. Most Anticipated New Indian Movies and Shows, എന്ന പേരിൽ ഓരോ മണിക്കൂറിലും അപ്‌ഡേറ് ചെയ്യപെട്ടുകൊണ്ടിരിക്കുന്ന വോട്ടിംഗ് അടിസ്ഥാനത്തിൽ സിനിമകളുടെ ഹൈപ് നിർണയിക്കുന്ന ലിസ്റ്റിലാണ് വീണ്ടും ഒരു കന്നഡ സിനിമ മറ്റ്‌ ഭാഷ വമ്പന്മാരെ പിന്തള്ളി ആധിപത്യം നേടിയിരിക്കുന്നത്. കന്നഡ സിനിമയുടെ മുഖഛായ തന്നെ മാറ്റിയെഴുതിയ കെ ജി എഫ് 2 കഴിഞ്ഞ ഏപ്രിൽ സമയത്ത് തമിഴ് സിനിമയുടെ ദളപതി വിജയുടെ ബീസ്റ്റ് എന്ന ചിത്രത്തെ സമാന രീതിയിൽ പിന്തള്ളുകയും ആ നേട്ടം ബോക്സ് ഓഫീസിലും ആവർത്തിച്ചപ്പോൾ ഇന്ത്യൻ സിനിമയിൽ തന്നെ അതൊരു അത്ഭുതമായിമാറിയിരുന്നു. വീണ്ടും കന്നഡ സിനിമ ചരിത്രം ആവർത്തിക്കുകയാണോ എന്ന ആകാംഷയാണ് പാൻ ഇന്ത്യൻ തലത്തിൽ സൃഷ്ടിച്ചുകൊണ്ടിരിക്കുന്നത്. കന്നഡ സിനിമാലോകവും കർണാടക പ്രേക്ഷകരും ഒന്നടങ്കം വീണ്ടും ഒരു വല്യ അഭിമാന ചിത്രമായി കാത്തിരിക്കുകയാണ് ഈ ചിത്രത്തെ. കിറിക് പാർട്ടി, അവനെ ശ്രീമന്നാരായണ എന്നീ വമ്പൻ വിജയങ്ങൾക്ക് ശേഷം കന്നഡ സിനിമയുടെ 'മിസ്റ്റർ-പെർഫെക്ഷനിസ്റ്റ്' മൂന്ന് വർഷത്തിന് ശേഷം ആദ്യമായി രക്ഷിത് ഷെട്ടി നായകനായി പുറത്തിറങ്ങുന്ന ചിത്രമെന്ന പ്രത്യേകതയും ഉണ്ട് 777 ചാർളിക്ക്.

അണിയറവിശേഷങ്ങൾ

ജൂൺ 10ന് ചിത്രം ലോകമെമ്പാടും റിലീസ് ചെയ്യും. മലയാളിയായ കിരൺ രാജാണ് ചിത്രം സംവിധാനം ചെയ്തിരിക്കുന്നത്. പരംവാഹ് സ്റ്റുഡിയോയുടെ ബാനറിൽ ജി.എസ്. ഗുപ്തയും രക്ഷിത് ഷെട്ടിയും ചേർന്നാണ് ചിത്രം നിർമ്മിച്ചിരിക്കുന്നത്. ചിത്രത്തിന്റെ മലയാളം പതിപ്പ്‌ പൃഥ്വിരാജും, തമിഴിൽ കാർത്തിക്‌ സുബ്ബരാജും‌‌, തെലുങ്കിൽ നാനിയും അതാത്‌ ഭാഷകളിൽ വിതരണത്തിനെത്തിക്കുന്നു.

പരുക്കനായ 'ധർമ്മ'യുടെ ജീവിതത്തിലേക്ക് 'ചാർളി' എന്ന നായ കടന്നുവരുന്നതും ധർമ്മയുടെ ജീവിതത്തിലുണ്ടാക്കുന്ന മാറ്റങ്ങളുമാണ് ചിത്രത്തിന്റെ പ്രമേയം. മനുഷ്യനും വളർത്തുനായയും തമ്മിലുള്ള ആത്മബന്ധത്തിൻ്റെ കഥയാണ് ചിത്രം പറയുന്നത്. സംഗീത ശൃംഗേരിയാണ്‌ നായിക. രാജ് ബി ഷെട്ടി, ഡാനിഷ് സൈട്ട്, ബോബി സിംഹ എന്നിവരാണ് മറ്റ് പ്രധാന താരങ്ങൾ. മലയാളിയായ നോബിൻ പോളാണ്‌ സംഗീതം ഒരുക്കിയിരിക്കുന്നത്. വെറും പാൻ-ഇന്ത്യനല്ല ഇതൊരു ഗ്ലോബൽ ചിത്രമാക്കി മാറ്റാൻ കഴിയുമെന്നാണ് ചാർളി ടീം പ്രതീക്ഷകൾ പങ്കുവെക്കുന്നത്. പി. ആർ. ഓ: മഞ്ജു ഗോപിനാഥ്‌, മാർക്കറ്റിംഗ്‌: ഹെയിൻസ്‌.