വിജയ് യേശുദാസിന്റെ ജന്മദിന സമ്മാനമായി സാൽമൺ 3Dയിലെ രണ്ടാം ലിറിക്കൽ വിഡിയോ ഇന്ന് .
ഏഴ് ഭാഷകളില്‍ ചരിത്രം കുറിക്കാനൊരുങ്ങുന്ന ത്രി ഡി ചിത്രം സാല്‍മണിലെ രണ്ടാമത്തെ ലിറിക്കല്‍ വീഡിയോ ഇന്ന് പുറത്തിറങ്ങുന്നു. വിജയ് യേശുദാസിന്റെ ജന്മദിനത്തില്‍ അദ്ദേഹത്തിനുള്ള സമ്മാനമായാണ് വീഡിയോ പുറത്തുവരുന്നത്. ചിത്രത്തിലെ ആദ്യഗാനം ഫെബ്രുവരി 14ന് പ്രണയ ദിനത്തിലാണ് പുറത്തിറങ്ങിയത്. ടി സീരിസ് ലഹരിയുടെ വെബ്‌സൈറ്റ് വഴിയാണ് രണ്ടാം ഗാനവും പുറത്തെത്തുന്നത്.
ഒന്‍പത് സുഹൃത്തുക്കളോടൊപ്പമുള്ള പഠന കാലത്തിന്റെ ഗൃഹാതുരത്വം തോന്നുന്ന തരത്തിലാണ് രണ്ടാം ഗാനം ഒരുക്കിയിരിക്കുന്നത്. വിജയ് യേശുദാസ് നായകനായ സിനിമയില്‍ അദ്ദേഹം തന്നെ ആലപിക്കുന്ന ഗാനമാണ് ഇന്ന് പുറത്തിറങ്ങുന്നത്. നവീന്‍ കണ്ണന്റെ രചനയില്‍ ശ്രീജിത്ത് എടവനയാണ് സംഗീതം നല്കിയിരിക്കുന്നത്. ലണ്ടനില്‍ റെക്കോര്‍ഡ് ചെയ്ത ഗാനത്തിന് കൊച്ചിയില്‍ മിക്‌സിംഗ് നിര്‍വഹിച്ച് കാനഡയിലാണ് മാസ്റ്ററിംഗ് ചെയ്തിരിക്കുന്നത്.
ഡോള്‍സ്, കാട്ടുമാക്കാന്‍ എന്നീ ചിത്രങ്ങള്‍ക്ക് ശേഷം മലയാളിയായ ഷലീല്‍ കല്ലൂര്‍ രചനയും സംവിധാനവും നിര്‍വഹിക്കുന്ന ത്രി ഡി റൊമാന്റിക് സസ്‌പെന്‍സ് ത്രില്ലര്‍ ചിത്രമാണ് സാല്‍മണ്‍. എം ജെ എസ് മീഡിയയുടെ ബാനറില്‍ ഷാജു തോമസ് , ജോസ് ഡി പെക്കാട്ടില്‍, ജോയ്‌സ് ഡി പെക്കാട്ടില്‍ എന്നിവര്‍ ചേര്‍ന്ന് നിര്‍മിക്കുന്ന സാല്‍മണ്‍ ത്രി ഡി ഏഴു ഭാഷകളില്‍ ഒരേ സമയം റിലീസ് ചെയ്യും. ചിത്രത്തിന് 15 കോടി രൂപയാണ് ബജറ്റ്.
ജനിച്ചു വീഴുമ്പോള്‍ തന്നെ അനാഥരാകുകയും പ്രതികൂല കാലാവസ്ഥകളെ തരണം ചെയ്ത് കടല്‍ മാര്‍ഗ്ഗം ഭൂഖണ്ഡങ്ങള്‍ മാറിമാറി സഞ്ചരിക്കുകയും ചെയ്യുന്ന അപൂര്‍വ്വ സവിശേഷതകളുള്ള സാല്‍മണ്‍ മത്സ്യത്തിന്റെ പേരാണ് സിനിമയ്ക്ക് നല്കിയിരിക്കുന്നത്. ഇതേ രീതിയില്‍ പ്രതികൂല അന്തരീക്ഷം തരണം ചെയ്യുന്നതും ജീവിതം കരുപ്പിടിപ്പിക്കുന്നതിനിടയിലുള്ള സംഭവ ഗതികളുമാണ് ചിത്രത്തിന്റെ പ്രമേയം.
കേരളത്തിന് പുറമേ ദുബൈ, മലേഷ്യ, റാമോജി ഫിലിം സിറ്റി, കുളു, മണാലി എന്നിവിടങ്ങളിലാണ് എട്ട് ഷെഡ്യൂളുകളിലായി സാല്‍മണ്‍ ചിത്രീകരിച്ചത്. തമിഴിന് പുറമേ മലയാളം, കന്നഡ, തെലുങ്ക്, ഹിന്ദി, മറാത്തി, ബംഗാളി ഭാഷകളിലാണ് ചിത്രം ഒരുങ്ങുന്നത്.
വിവിധ ഇന്ത്യന്‍ ഭാഷാ അഭിനേതാക്കളായ ചരിത് ബലാപ്പ, രാജീവ് പിള്ള, ഷിയാസ് കരീം, ജാബിര്‍ മുഹമ്മദ്, സജിമോന്‍ പാറയില്‍, ഇബ്രാഹിംകുട്ടി, സമീര്‍, ധ്രുവന്ത്, ബഷീര്‍ ബഷി, പട്ടാളം സണ്ണി, നവീന്‍ ഇല്ലത്ത്, സി കെ റഷീദ്, ജെര്‍മി ജേക്കബ്, വിനു അബ്രഹാം, സുമേഷ് മുഖത്തല, അലിം സിയാന്‍, സിനാജ്, റസാക്്, ഫ്രാന്‍സിസ്, മീനാക്ഷി ജയ്‌സ്വാള്‍, ജോനിത ഡോഡ, പ്രേമി വിശ്വനാഥ്, തന്‍വി കിഷോര്‍, ആഞ്‌ജോ നയാര്‍, ഷിനി അമ്പലത്തൊടി, ബിസ്മി നവാസ്, നസ്‌റീന്‍ നസീര്‍, ദര്‍ശിനി, സംഗീത വിപുല്‍, ജ്യോതി ചന്ദ്രന്‍, സീതു, അഫ്‌റീന്‍ സൈറ, ബേബി ദേവാനന്ദ, ബേബി ഹെന തുടങ്ങിയവരോടൊപ്പം സംവിധായകന്‍ ഷലീല്‍ കല്ലൂരും അഭിനയിക്കുന്നു.
രാഹുല്‍ മേനോനാണ് ക്യാമറ. ജീമോന്‍ പുല്ലേലിയാണ് ത്രി ഡി സ്റ്റീരിയോസ്‌കോപിക് ഡയറക്ടറും ഷിജിന്‍ മെല്‍വിന്‍ ഹട്ടണ്‍ സൗണ്ട് ഡിസൈനറുമാണ്. വിനസ്‌ക്‌സ് വര്‍ഗ്ഗീസ് ത്രി ഡി സ്റ്റീരിയോസ്‌കോപ് സൂപ്പര്‍വൈസറും ജീമോന്‍ കെ പൈലി (കുഞ്ഞുമോന്‍) ത്രി ഡി സ്റ്റീരിയോഗ്രാഫറുമാണ്. സൂരജ് എം കെയാണ് ക്രിയേറ്റീവ് വി എഫ് എക്‌സ് ഡയറക്ടര്‍. ഫസല്‍ എ ബക്കര്‍ റീ റിക്കോര്‍ഡിംഗ് മിക്‌സറും ശ്യാം ശശിധരന്‍ എഡിറ്റിംഗും നിര്‍വഹിക്കുന്നു. ബാദുഷയാണ് പ്രൊഡക്ഷന്‍ കണ്‍ട്രോളര്‍.
ആര്‍ ഗോവിന്ദരാജാണ് തമിഴ് വിവര്‍ത്തനം.
കി എന്റര്‍ടെയ്ന്‍മെന്റ്‌സ് അനന്തപത്മനാഭ ഭട്ട് എക്‌സിക്യൂട്ടീവ് പ്രൊഡ്യൂസറും മുഷ്ത്താഖ് റഹ്മാന്‍ ലൈന്‍ പ്രൊഡ്യൂസറു(എം ജെ എസ്)മാണ്.
No comments: